بيع من غير فصال

مش فاهمة ليه بقى من السهل البيع ومن غير فصال وساعات من غير تمن كمان بقى اسهل حاجة على الناس تبيعك وتتخلى عنك سواء صحابك او احبابك او اى حد قريب منك بسهولة كده تلائيهم باعولك ومن غير زعل عليك وباعوا ذكرياتهم الحلوة معاك والبيعة نهائى بستغرب ومازالت بستغرب ليه بنبيع بعض ليه بعد ما تخلص وتحب من قلبك تتباع ليه بقينا لعبة مالهاش تمن



ليه تلاقي الشاب من دول يحب البنت ويعلقها بيه ويعشمها وفي الاخر يبيعها زي ما يكون موضة انه يبقى عنده صحبة وبنت ماشي معاها مسافة مايزهق ولا يشوف شوفة تانية تلاقيه باع هو اللعب بمشاعر الناس سهل كده؟؟ والبنات برضة تلائى البنت من دول سهل تبيع ومترجعش والطرف التانى فى الحالتين بيدمر والبايع معندوش ضمير انا بستغرب جمودية القلب دي وبلعن الحب بتاع الاشخاص اللى من الصنف دا

اخر مسخرة

قريت النهاردة فى المدونة عند الدكتور طنطاوى تعليق مستفز جدا بيتكلم عن طابور العوانس اللى بيجرى ورا الدكتور واللى خلانى ارد انه جاب سيرة تندر روز فانس .. عزيزى انا مش هرد عليك باسلوبك اللى كله سخرية وكلام جارح بس هرد بطريقتى

اولا : كلاماتك واسلوبك جارح وطريقتك فى العرض مستفزة وكنت فاكرة انى هروح الاقى مدونة مليانة كلام فاضي فى الاكونت بتاعك ولكن صدمت لما لائيتك احدى مدوناتك فيها طابع دينى بارز اوى وبالتالى كان ابسط حاجة تعملها تلتزم بادب الحوار وتراعى ان الكلمة الطيبة صدقة مش تأذى مشاعر الناس انا شخصيا ادايئت من طريقتك وكلامك أذانى ومش قادرة من جوايا اسامحك وقصاصي منك هيكون يوم القيامة ربنا يسامحك

ثانيا : لو فرضنا على حد تعبيرك اننا عوانس فدا شيء مش بايدينا دى ظروف مجتمع وسايدة على الجميع ولو لو لو فرضنا تانى اننا عوانس فدا شيء لا يقلل من شأننا ولا يسيء لينا ومكنش حد طلب منك تدور لنا على عرسان انت او غيرك عشان تشيل همنا وماشي تقول علينا عوانس

ثالثا : كون اننا نعمل مدونة نرد فيها على تدوينات الدكتور طنطاوى فدا من منطلق انه قال انه بيكلم فى مواضيع عامة عن الحب ومن حقنا نشارك وكل واحد يكتب فى مدونته اللى هوا عاوزه وانت لم تنصب حكم على الكون عشان تحكم على دول انهم عوانس او لا كمان احنا محتوى مدونتنا عن الحب ولو دورت هتلاقى مدونات كتير كده بما فيها مدونة الدكتور طنطاوى وغيره ومعتقدش ان كل واحد هيكتب فى الحب هتقول عليه عوانس

رابعا : بتعليقك احرجت نفسك لان مليون مرة طلب الدكتور ان محدش يرد فى التعليقات غير على موضوع البوست وردك كل اللى يقراه يفهم انك غيران من الدكتور طنطاوى عشان عنده معجبات وعوانس على حد تعبيرك بيحبوا مدونته وعملوا مدونة مخصوص للرد على تدويناته

موضوع أمي اللى كتبه الدكتور حلو ومثالى وطبعا ناس كتير تتمنى كده بس لو جينا بصينا هنلاقى الرجالة لما تفتح لهم قلبك وتعاملهم معاملة الام يبتدوا يتكبروا ويطلعوا فيها معرفش على نيلة ايه ويفضل يفكر يرتبط بالبنت ولالا ويروح فى الاخر يدبس فى واحدة تسهره الليل وتطلع عينه لمجرد انها كانت بتصده يبقى الحل اننا ننفض لكل الرجالة عشان هما اللى يجروا ورانا واعذرنا يا دكتور لو مأدرتش تلاقي فينا الحبيبة اللى تئدر تديلك حنان الام لانكوا انتوا اللى موتوا جوانا كل المعانى الحلوة ودايما تبيعوا الحب والقلب اللى خايف عليكوا وتشتروا الحاجة البعيدة اللى بتعذبكوا حتى لو اضطريتوا تدوسوا على القلوب اللى حبتكم بجد وتعذبوها معاكم

معرفش ليه كله بقى بيدوس على كله كأن المشاعر دى حاجة ملهاش تمن واحد زى الاخ اللى علق عند الدكتور فى المدونة بدون مراعاة لمشاعر الناس وواحد تانى اللى علقلى فى الموضوع اللى فات وقال انا مستعد اتجوزها هيا مجرد كلمة قالها صحيح بس كلها استخفاف بالكلام اللى مكتوب وانا عشان اتنأور عليه اكتر قولتله انا موافقة اهو بستهبل عليه اشمعنى هو يعنى واهو كله بيدوس على كله ومحدش بيهمه مشاعر حد قال يعنى انا خلاص دائت فى وشي ومستنية سي الافندى اللى هيجي يتجوزنى من كلمتين كتبتهم على مدونة اما مسخرة والله

على بالى

حبيته بينى وبين نفسى ومقلتلوش على فى نفسى

معرفشى ايه بيحصلى لما بشوف عنيه

مبأتش عارفه اقوله ايه معرفش ليه خبيت عليه

بضعف اوووووى وانا جنبه وبسلم عليه

كل حب الدنيا دى فى قلبى ليك

د انت اغلى الناس عليه روحى فيك

د انت لو قدام عنيه اشتاق اليك

على بالى ولا انت دارى بالى جرالى

والليالى سنين طويله سبتهالى

ي انشغالى بكل كلمه قلتهالى

الكلام لو كان يعبر ع الحنان

كنت قلت انى بحبك من زمان

كل يوم الشوق بيكبر عليه بان

صائدي العرسان

أنا مش داخلة المدونة دى عشان اهلل واصقف للدكتور طنطاوى وخلاص زى ما هو قال انا داخلة اناقش حاجات محيراني بس من خلال افكار الدكتور طنطاوى الجميلة الدكتور طنطاوى بيقول ان الانسان المفروض يكون ايجابي فى حبه يعنى يفكر فى الجوازياريت كل الرجالة يفكروا كده بدل ما يقولوا علي البنات انهم تحولوا لصائدي العرسان ولا تنسوا يا معشر الرجالة ان انتوا اللى ربيتونا على كده اكبرى وخلصي عشان تتجوزى عقبال ما نفرح بيوم فرحك يابنتى ليه النهاردة ايها الرجال بتتهربوا من الحب بالجمل اللى زى البنات تحولوا لصائدي عرسان او احنا مش عارفين انتوا مسروعين على ايه وبتقولوها كأنها جريمة المفروض ان البنات يداروا ويكسفوا منها ويدافعوا عن نفسهم انا بقي مش هدافع عن نفسي ولا هكسف من انى عاوزة اتجوز ومسروعة على الجوازوهعترف انى بعمل كل الوسايل اللى تخلينى اعرف اصطاد عريس مثلا لما بروح فرح بحط مكياج ولو اعرف واحدة قريبتنا ابنها على وش جواز بتقرب ليها واعملها حلووعلى طول بعامل زمايلى الولاد حلو وابان انى حنينة وقلبي عليهم يمكن حد منهم يفكر يجوزنى ادعولي ان ربنا يعدلها لي ويعدلها للبنات كلها

سلامتك من الاه

حبيبى

سلامتك من الاه

قبل ما تنزل صدرك

احسها بصدرى والله

مقاله 3

اعتقد انه دورى فى الكتابه المره دى

مدونه محدش يقدر يقول عليها اى كلمه غير انها رائعه ومبهره ورقيقه وانيقه وجذابه وتسحر كل اللى بيقراها

كاتب مقدرش اقول عليه غير انه انسان حساس وخلوق وبيعرف ازاى يحب وازاى يخلى كل الناس تحبه بدون ما يعمل حاجه

موضوعات معرفش اوصفها بايه لانها ارقى من كلماتى كلها لكن كفايه تقره اخر تدوينه اسمها خدعتنى يابحر عشان تحس ان الكلمات اللى بيستخدمها جايه من عالم تانى غير الى احنا عايشين فيه لانه بجد ساحر فى استخدام كلماته وعباراته

كاتب ودكتور وفنان و مقدرش غير اقوله انه بحترمه وبحبه جدا

مقاله 2

لانى اعرف د.طنطاوى شخصيا فعلشان كده انا بشارك معاكو فى المدونه دى لانه شخص جدير بالاحترام ويستحق احترامنا و تقديرنا و اهم حاجه خلتنى اشاركو حسه العالى و روحه الرقيقه الطيبه لاقصى درجه

فى كل تديوناته فى تندرروز بتحس بحبه و شوقه والمه و حزنه يعنى مشاعر مختلطه كلها مع بعضها لشخصيه فنانه ومجنونه فن كمان وكفايه تشوفو لوحاته الكاريكاتوريه وقصايده الرومانسيه و قصصه فى معرض واحد عشان تفهمو تكوينه اللى زى ما بيقوله معجون فن

تحياتى يا د.طنطاوى وكنت اتمنى انى اتلكم معاك واعرفك بنفسى لكنى فضلت اكون كده خلف الظل زى مانت عملت وخفيت شخصيتك عن الناس وكفايه انى بكدر اكتب براحتى بدون خوف من انك عارفنى و اى حاجه ممكن تحرجنى

تحياتى يا اعظم فنان دكتور فى مصر

تحياتى يا خلطه صلاح جاهين ونزار قبانى مصر